უნგრეთმა უკრაინიდან სასოფლო-სამეურნეო პროდუქციის იმპორტზე აკრძალვა გაახანგრძლივა
უნგრეთმა უკრაინიდან სასოფლო-სამეურნეო პროდუქციის იმპორტი აკრძალა, - ამის შესახებ უნგრეთის პრემიერ-მინისტრმა პეტერ მადიარმა გამოაცხადა.
„უნგრეთის მთავრობა უკრაინიდან სასოფლო-სამეურნეო პროდუქციის იმპორტს კრძალავს“, - წერს მადიარი X-ზე.
უნგრეთის მთავრობის დადგენილების თანახმად, აკრძალვა უკრაინიდან საქონლის, ღორის, ცხვრის, თხისა და ფრინველის ხორცზე, ასევე, კვერცხზე, თაფლზე, ბოსტნეულზე, ხორბალზე, ჭვავზე, ქერზე, სიმინდზე, წიწიბურაზე, ფქვილზე, მზესუმზირის ზეთსა და ღვინოზე ვრცელდება.
ასევე, მადიარის ცნობით, მისმა მთავრობამ უნგრეთის პარლამენტის მიერ სისხლის სამართლის საერთაშორისო სასამართლოს დატოვების შესახებ გასულ წელს მიღებული გადაწყვეტილება უკან გაიწვია.
ცნობისთვის, უნგრეთის ყოფილმა მთავრობამ სისხლის სამართლის საერთაშორისო სასამართლოდან (ICC) გასვლის შესახებ გასული წლის აპრილში გამოაცხადა, კერძოდ, ისრაელის პრემიერ-მინისტრის, ბენიამინ ნეთანიაჰუს ბუდაპეშტში ვიზიტის დროს.
2024 წლის ნოემბერში სისხლის სამართლის საერთაშორისო სასამართლომ ბენიამინ ნეთანიაჰუს წინააღმდეგ ომის დანაშაულებისა და კაცობრიობის წინააღმდეგ ჩადენილი დანაშაულებისთვის დაპატიმრების ორდერი გამოსცა.
უნგრეთი, როგორც სისხლის სამართლის საერთაშორისო სასამართლოს წევრი ვალდებული იყო, რომ ჰააგის სასამართლოს ბრძანება შეესრულებინა, თუმცა უნგრეთის მაშინდელმა პრემიერ-მინისტრმა, ვიქტორ ორბანმა სასამართლოს გადაწყვეტილებას ცინიკური უწოდა და ნეთანიაჰუ უნგრეთში მიიწვია, ხოლო მასთან შეხვედრაზე სისხლის სამართლის საერთაშორისო სასამართლოს დატოვების შესახებ გამოაცხადა.
