თურქეთში ოპოზიციური „სახალხო რესპუბლიკური პარტიის“ 2023 წლის ყრილობის შედეგებთან დაკავშირებით მიმდინარე გამოძიების ფარგლებში 13 პირი დააკავეს, - ინფორმაციას Reuters-ი ავრცელებს.

სტამბოლის მთავარი პროკურატურის განცხადებით, დაკავებულებს ბრალად ოპოზიციური „სახალხო რესპუბლიკური პარტიის 2023 წლის ყრილობის დროს ხმის მიცემის პროცესში ჩარევა ედებათ.

პროკურატურის ცნობით, საქმეში საუბარია „პოლიტიკური პარტიების შესახებ კანონის დარღვევისა“ და „ქრთამის აღების“ შესახებ.

ცნობისთვის, ხუთშაბათს თურქეთის სააპელაციო სასამართლომ „სახალხო რესპუბლიკური პარტიის“ 2023 წლის ყრილობის შედეგები ბათილად გამოაცხადა და მიზეზად დარღვევები დაასახელა. ასევე, გადაწყვეტილების თანახმად სასამართლომ პარტიის თავმჯდომარის თანამდებობიდან ოზგურ ოზელი გადააყენა, რომელიც აღნიშნულ პოზიციაზე სწორედ 2023 წლის ყრილობაზე აირჩიეს.

სააპელაციო სასამართლომ პარტიის თავმჯდომარის თანამდებობაზე ყოფილი ლიდერი, ქემალ ქილიჩდაროღლუ აღადგინა, რომელიც 2023 წლის საპრეზიდენტო არჩევნებში რეჯეფ თაიფ ერდოღანმა დაამარცხა.