უკრაინის პრეზიდენტის, ვოლოდიმირ ზელენსკის განცხადებით, უკრაინისთვის ევროკავშირის „ასოცირებული წევრის“ სტატუსის მინიჭება უსამართლო იქნება, რადგან კიევი ხმის მიცემის უფლებით ვერ ისარგებლებს.

Reuters-ი უკრაინის პრეზიდენტის, ვოლოდიმირ ზელენსკის მიერ ევროკავშირის ლიდერებისთვის გაგზავნილ წერილს გაეცნო.

ვოლოდიმირ ზელენსკი წერილში გერმანიის კანცლერის, ფრიდრიხ მერცის წინადადებას გამოეხმაურა, რომელიც ევროკავშირის სტრუქტურებში უკრაინისთვის პირდაპირი როლის მინიჭებას ითვალისწინებს, რაც სრულ გაწევრიანებამდე შუალედური ნაბიჯი იქნება.

გერმანიის კანცლერის წინადადება უკრაინისთვის „ასოცირებული წევრის“ სტატუსის მინიჭებას გულისხმობს, რომლის ფარგლებშიც უკრაინელი ოფიციალური პირები ევროკავშირის სამიტებსა და მინისტერიალებში მონაწილეობის მიღებას შეძლებენ, თუმცა ხმის მიცემის უფლება არ ექნებათ.

უკრაინის პრეზიდენტი წერს, რომ უნგრეთის ყოფილი პრემიერ-მინისტრის, ვიქტორ ორბანის თანამდებობიდან წასვლის შემდეგ გაწევრიანების შესახებ მოლაპარაკებებში მნიშვნელოვანი პროგრესის შესაძლებლობა შეიქმნა.

„უსამართლო იქნება, უკრაინა ევროკავშირში იყოს წარმოდგენილი, მაგრამ ხმის უფლების გარეშე დარჩეს. დროა, უკრაინის სრულუფლებიანი და მნიშვნელოვანი წევრობის მიმართულებით ნაბიჯი გადავდგათ“, - წერს ზელენსკი.

ზელენსკი ევროკავშირის ლიდერებს ომის განმავლობაში გაწეული მხარდაჭერისთვის მადლობას უხდის.

„ჩვენ ევროპას ვიცავთ სრულად და არა ნაწილობრივ. უკრაინა სამართლიან მიდგომას და ევროპის შემადგენლობაში თანაბარ უფლებებს იმსახურებს“, - აცხადებს ვოლოდიმირ ზელენსკი.