საფრანგეთმა ისრაელის ეროვნული უსაფრთხოების მინისტრს ქვეყანაში შესვლა აუკრძალა, - ამის შესახებ საფრანგეთის საგარეო საქმეთა მინისტრმა, ჟან-ნოელ ბარომ გამოაცხადა.

საფრანგეთის საგარეო საქმეთა მინისტრმა, ჟან-ნოელ ბარომ განაცხადა, რომ ისრაელის ეროვნული უსაფრთხოების მინისტრს იტამარ ბენ-გვირს საფრანგეთის ტერიტორიაზე შესვლა „გლობალური სუმუდის ფლოტილიის“ ბორტზე მყოფი „საფრანგეთის და ევროპის მოქალაქეების მიმართ მიუღებელი ქმედებების“ საპასუხოდ აეკრძალა.

„ჩვენ ვგმობთ ამ ფლოტილიის მიდგომას, რომელსაც არანაირი სასარგებლო შედეგი არ მოაქვს და დიპლომატიურ და საკონსულო სამსახურებს ზედმეტ ტვირთად აწვება, რომელთა პროფესიონალიზმს მე მივესალმები. თუმცა, ჩვენ საფრანგეთის მოქალაქეების მიმართ ამგვარ მუქარას, დაშინებასა და სასტიკ მოპყრობას ვერ დავუშვებთ, განსაკუთრებით მთავრობის წარმომადგენლის მხრიდან“, - წერს ბარო X-ზე.

ჟან-ნოელ ბარო ევროკავშირს იტამარ ბენ-გვირის წინააღმდეგ სანქციების დაწესებისკენ მოუწოდებს.

ცნობისთვის, ოთხშაბათს ისრაელის ეროვნული უსაფრთხოების მინისტრმა, იტამარ ბენ-გვირმა სოციალურ ქსელში პალესტინელების მხარდამჭერი დაკავებული აქტივისტების ვიდეო გაავრცელა. ვიდეოში ჩანს თუ როგორ ეპყრობა ბენ-გვირი დაკავებულ აქტივისტებს, რომლებიც მუხლებზე დაჩოქილები და ზურგს უკან ხელებშეკრულები არიან. ბენ-გვირი მათ შორის დადის ისრაელის დროშით და ყვირის: „კეთილი იყოს თქვენი მობრძანება ისრაელში, ჩვენ ვართ აქ ბატონ-პატრონები“. ვიდეოს თან ახლავს წარწერა: „ასე ვესალმებით ტერორიზმის მხარდამჭერებს“.

ფლოტილია „სუმუდი“ 14 მაისს თურქეთის ქალაქ მარმარისიდან გავიდა და 18 მაისს ისრაელის საზღვაო ძალებმა საერთაშორისო წყლებში, ღაზადან დაახლოებით 250 საზღვაო მილის დაშორებით, შეაჩერეს. ორგანიზატორების თქმით, 40-ზე მეტი ქვეყნიდან 428 ადამიანი დააკავეს. „გლობალური სუმუდის ფლოტილიის“ განცხადებით, ბორტზე მყოფ აქტივისტებს ღაზაში მცხოვრები პალესტინელებისთვის საკვები, მათ შორის ბავშვების საკვები და სამედიცინო დახმარება გადაჰქონდათ.