მივესალმები აშშ-სა და ირანს შორის შეთანხმების მიღწევისკენ პროგრესს - გვჭირდება შეთანხმება, რომელიც ნამდვილად მოახდენს კონფლიქტის დეესკალაციას, ხელახლა გახსნის ჰორმუზის სრუტეს და უზრუნველყოფს უფასო ნავიგაციის სრულ თავისუფლებას, - ამის შესახებ ევროკომისიის პრეზიდენტი ურსულა ფონ დერ ლაიენი სოციალურ პლატფორმა X-ზე წერს.

ევროკომისიის პრეზიდენტი ხაზს უსვამს, რომ ირანს არ უნდა მიეცეს ბირთვული იარაღის შექმნის უფლება.

„მან ასევე უნდა შეწყვიტოს რეგიონში დესტაბილიზაციის გამომწვევი ქმედებები, პირდაპირ თუ „პროქსების“ მეშვეობით, ასევე მეზობლებზე გაუმართლებელი თავდასხმები“, - აცხადებს ევროკომისიის პრეზიდენტი.

მისი მტკიცებით, ევროპა გააგრძელებს საერთაშორისო პარტნიორებთან მუშაობას, რათა გამოიყენოს ეს მომენტი ხანგრძლივი დიპლომატიური გადაწყვეტისთვის და შეაჩეროს ამ კონფლიქტის გავრცელება, განსაკუთრებით მიწოდების ჯაჭვებსა და ენერგომატარებლების ფასებზე.

ცნობისთვის, აშშ-ის პრეზიდენტის დონალდ ტრამპის განცხადებით, შეერთებულ შტატებსა და ირანს შორის შეთანხმება „ძირითადად მოლაპარაკებულია“ და რომ ჰორმუზის სრუტე ხელახლა გაიხსნება. „შეთანხმება ძირითადად უკვე მოლაპარაკებულია და მხოლოდ საბოლოო გაფორმებას ექვემდებარება ამერიკის შეერთებულ შტატებს, ირანის ისლამურ რესპუბლიკასა და სხვა ჩამოთვლილ ქვეყნებს შორის“, - აღნიშნა ტრამპმა.