გაერთიანებულმა სამეფომ, საფრანგეთმა, ესპანეთმა, იტალიამ და კანადამ დაბლოკეს ნატო-ს გენერალური მდივნის, მარკ რუტეს ინიციატივა, რომელიც უკრაინისთვის სამხედრო დახმარებისთვის მშპ-ს 0.25%-ის გამოყოფას ითვალისწინებს, - ამის შესახებ The Telegraph-ი წყაროებზე დაყრდნობით წერს.

მარკ რუტემ განაცხადა, რომ მისი ინიციატივა ვერ განხორციელდება მოკავშირეების მხრიდან საკმარისი მხარდაჭერის არარსებობის გამო. ამასთან, მან იმედი გამოთქვა, რომ გეგმას ალიანსის ანკარაში დაგეგმილ სამიტზე დაამტკიცებენ.

გამოცემა წერს, რომ მარკ რუტეს იდეს მიმართ მხარდაჭერა გამოხატა ნატო-ს სულ მცირე შვიდმა ქვეყანამ, რომლებიც უკრაინისთვის სამხედრო დახმარებაზე მშპ-ს 0.25 პროცენტზე მეტს ხარჯავენ.

The Telegraph-ი წერს, რომ კილის ინსტიტუტის მიერ შეგროვებული საჯაროდ ხელმისაწვდომი მონაცემების თანახმად, ნიდერლანდები, პოლონეთი, სკანდინავიისა და ბალტიის ქვეყნები მშპ-ს 0.25 პროცენტის ან მეტის ოდენობის მხარდაჭერის შეთავაზებით გამოდიან. თუმცა, ალიანსში გადაწყვეტილებების მიღება ერთსულოვან მხარდაჭერას მოითხოვს და ლონდონი, პარიზი, მადრიდი, რომი და ოტავა წინააღმდეგი არიან.

გაერთიანებული სამეფოს საგარეო საქმეთა, თანამეგობრობისა და განვითარების ოფისის წარმომადგენელმა The Telegraph-ს განუცხადა, რომ „გაერთიანებული სამეფო აგრძელებს ნატო-ს მოკავშირეებთან ყველა წინადადებაზე თანამშრომლობას, რათა უზრუნველყოს, რომ ალიანსმა უკრაინის საუკეთესო მხარდაჭერა შეძლოს“.

საფრანგეთის, იტალიის, ესპანეთის და კანადის წარმომადგენლებმა The Telegraph-თან კომენტარი არ გააკეთეს.