ირანის საგარეო საქმეთა სამინისტროს განცხადებით, აშშ-სთან მიმდინარე მოლაპარაკებები ამჟამად ომის დასრულებაზეა ორიენტირებული და არა ბირთვული საკითხის დეტალებზე, - ინფორმაციას Iran International-ი ავრცელებს.

გამოცემის ცნობით, ირანის საგარეო საქმეთა სამინისტროს პრესსპიკერმა ესმაილ ბაგაიმ განაცხადა, რომ თეირანი ამ ეტაპზე ბირთვულ საკითხთან დაკავშირებულ დეტალებს არ განიხილავს.

ამასთან, ირანული გამოცემა ISNA-ს ინფორმაციით, მაღალი რანგის დიპლომატმა მათთან საუბარში განაცხადა, რომ თუ შეერთებული შტატები შეასრულებს ნაკისრ ვალდებულებებს და პირველი ეტაპის დროს მიღწეული შეთანხმება წინ წავა, ბირთვული საკითხი, შესაძლოა, 60-დღიანი მოლაპარაკებების დროს განიხილონ.

„ბირთვული იარაღის საკითხი, ურანის გამდიდრებისა და მაღალგამდიდრებული ურანის მარაგის საკითხები 60-დღიან მოლაპარაკებების დროს განიხილება სანქციების მოხსნისა და ირანის დაბლოკილი აქტივების სრულად განთავისუფლების სანაცვლოდ და აშშ-ის ძალები სრულად გავლენ ირანის მიმდებარე ტერიტორიებიდან“, - ციტირებს გამოცემა მის განცხადებას.