საქართველო „დიზაინის სამართლის შესახებ“ რიადის ხელშეკრულებას და მის რეგულაციებს უერთდება.

აღნიშნულ ხელშეკრულებასთან შეერთების საკითხი პარლამენტში მთავრობამ წარადგინა და ის კომიტეტებში განხილვის საგანია.

რიადის ხელშეკრულება 2024 წელს საუდის არაბეთში, ინტელექტუალური საკუთრების მსოფლიო ორგანიზაციის (WIPO) დიპლომატიურ კონფერენციაზე მიიღეს. როგორც მთავრობა განმარტავს, რიადის ხელშეკრულებასთან შეერთების მიზანია დიზაინის დაცვის პროცედურების გამარტივება, განსაკუთრებით მცირე და საშუალო ბიზნესისთვის. ხელშეკრულება ამცირებს ბიუროკრატიულ ბარიერებს და სხვადასხვა ქვეყანაში განსხვავებულ პროცედურებთან დაკავშირებულ სირთულეებს.

მას ხელს აწერს და აღიარებს ინტელექტუალური საკუთრების მსოფლიო ორგანიზაციის 28 წევრი სახელმწიფო.

მთავრობის შეფასებით, აღნიშნულ ხელშეკრულებასთან შეერთებით, ქართველ დიზაინერებსა და მცირე თუ საშუალო ბიზნესის წარმომადგენლებს საზღვარგარეთ საკუთარი ნამუშევრების სამართლებრივი დაცვა გაუმარტივდებათ.