ირაკლი კობახიძის განცხადებით, 2029 წლისთვის ანაკლიის პროექტის პირველი ფაზის დასრულება „აბსოლუტურად რეალურია“
პრემიერ-მინისტრ ირაკლი კობახიძის განცხადებით, 2029 წლისთვის ანაკლიის პროექტის პირველი ფაზის დასრულება „აბსოლუტურად რეალურია“.
როგორც მან აღნიშნა, უახლოეს თვეებში უნდა გადაწყდეს ჩინურ-სინგაპურულ კონსორციუმთან თანამშრომლობის გაგრძელების საკითხი.
„ჩინურ - სინგაპურული კონსორციუმთან მოლაპარაკებები გრძელდება. ამ ეტაპზე, არ იგეგმება რაიმე ახალი პროცესის დაწყება, ვაგრძელებთ მოლაპარაკებებს. იქიდან გამომდინარე, რომ პროექტის განხორციელება ისედაც გრძელდება, ჩვენ გვაქვს გარკვეულ ეტაპამდე იმის საშუალება, რომ ხელოვნურად არ დავაჩქაროთ პროცესები. თუმცა რაღაც ეტაპზე ბუნებრივია, შესაბამისი გადაწყვეტილება უნდა იყოს მიღებული. ვფიქრობ, რომ წლის ბოლოს არ უნდა გადასცდეს ეს ყველაფერი. მალე, უახლოეს თვეებში უნდა იყოს მიღებული გადაწყვეტილება, თანამშრომლობის გაგრძელების, კონკრეტულ მოდელთან დაკავშირებით.
რაც შეეხება სამუშაოებს, სამუშაოები გრძელდება. იყო ძალიან მცირე პაუზა რაც იყო განპირობებული ხელშეკრულების გადახედვით. ძალიან მნიშვნელოვნად შემცირდა ხელშეკრულების პირობები, ფინანსური მხარე. სახელმწიფოს მოუწევს ბევრად ნაკლები ხარჯის გაწევა, დაღრმავების სამუშაოებისთვის, ამან წაიღო მცირე დრო, თუმცა შესაბამისი ინტენსივობით გრძელდება სამუშაოები. შესაბამისად, 2029 წლისთვის პროექტის პირველი ფაზის დასრულება არის აბსოლუტურად რეალური. პარალელურად ვმუშაობთ გზაზე, რკინიგზაზე, ესეც არის პარალელური პროცესი. სათანადო ვადებში ყველა პროექტი იქნება განხორციელებული“,- განაცხადა კობახიძემ.
