თუ არ იქნება მეორე მხრიდან აღიარება, ეს შეწყალება ვერ შედგება - ჩვენ თუ გვინდა „შეწყალება“ გამოვიყენოთ იმისთვის, რომ იერიშის ახალი გუნდი შევქმნათ, ამას შეწყალება არ ჰქვია, - ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა აქციების პერიოდში დაკავებული პირების შესაძლო შეწყალებაზე საუბრისას განაცხადა.

მისივე თქმით, აქციებზე ვიხილეთ მიზანმიმართული შეტევა პოლიციაზე, სახელმწიფო ინსტიტუტებზე, კონსტიტუციურ წყობაზე და ამ მიმართულებით, ყველა მხარემ თავისი წილი პასუხისმგებლობა უნდა აიღოს.

„რა მიზანი აქვს შეწყალებას?! ვიღაც ამბობს, რომ შეწყალებას ის მიზანი აქვს, რომ ამან გარკვეულწილად, შერიგებას, მშვიდობას შეუწყოს ხელი. კი ბატონო, გავყვეთ ამ ლოგიკას. მოდი ასე ვთქვათ, როდესაც ლაპარაკია, რომ ხელისუფლება არბევდა მშვიდობიან მოქალაქეებს და ამბობ, რომ ეს ხალხი იმიტომ უნდა გამოუშვა რომ პირსისხლიანი დიქტატურის მსხვერპლია, აქ სიმართლე ხომ არ არსებობს?! ჩვენ ვნახეთ, რომ ეს იყო მიზანმიმართული შეტევა პოლიციაზე, სახელმწიფო ინსტიტუტებზე, კონსტიტუციურ წყობაზე და აქედან გამომდინარე, თუ არ იქნება მეორე მხრიდან ამის აღიარება, ეს შეწყალება ვერ შედგება. ჩვენ თუ გვინდა „შეწყალება" გამოვიყენოთ იმისთვის რომ იერიშის ახალი გუნდი შევქმნათ, ამას შეწყალება არ ჰქვია. კეთილი ინებონ და ყველა მხარემ თავისი წილი პასუხისმგებლობა აიღოს ამ მიმართულებით. პირველ რიგში, იმ ადამიანებმა აიღონ პასუხისმგებლობა, ვინც ატრენინგებდა ამ ჯგუფებს, ვინც ახალგაზრდებს მოუწოდებდა ასეთი საქმიანობისკენ," - განაცხადა ქადაგიშვილმა.