რუსეთის პრეზიდენტის პრესსპიკერის, დიმიტრი პესკოვის თქმით, სომხეთის პრემიერ-მინისტრმა ნიკოლ ფაშინიანმა განაცხადა, რომ ეკონომიკური ინტეგრაციის გზაზე საბოლოო გადაწყვეტილებას სომეხი ხალხი მიიღებს.

„როგორც ფაშინიანმა მაშინ განმარტა (რუსეთის პრეზიდენტ ვლადიმერ პუტინთან შეხვედრაზე), გარკვეულ მომენტში საბოლოო გადაწყვეტილება (ეკონომიკური ინტეგრაციის გზაზე) უნდა იქნას მიღებული და ეს რეფერენდუმის გზით მოხდება. ანუ, სწორედ სომეხი ხალხი ილაპარაკებს“, - აღნიშნა პესკოვმა.

მისი თქმით, სომხეთში არსებობენ პოლიტიკური ძალები, რომლებიც მხარს უჭერენ განვითარების რუსულ ვექტორს და ინტეგრაციულ პროცესებს რუსეთის მონაწილეობით.

„ჩვენ ვიცით, რომ სომხეთში არსებობენ პოლიტიკური ძალები, რომლებიც სრულად უჭერენ მხარს განვითარების რუსულ ვექტორს და ორიენტირებულები არიან რუსეთის ფედერაციის მონაწილეობით მიმდინარე ინტეგრაციულ პროცესებში შემდგომ და უფრო ღრმა ჩართულობაზე“, - აღნიშნა პესკოვმა.

მისი თქმით, რუსეთი ამ მიდგომას აფასებს.