სამწუხაროა, მაგრამ ახალი არ არის, რომ სახელმწიფოსა და ეკლესიის ერთიანობა აღიზიანებს ადამიანთა ჯგუფს, რომელსაც შინაგან სლოგანად აქვს გადაქცეული დაყოფისა და გაბატონების სტრატეგია უცხო ძალების დავალებით, - ასე შეაფასა საქართველოს ვიცე-პრემიერმა, სახელმწიფო მინისტრმა სამართალდამცავი ორგანოების კოორდინაციის საკითხებში მამუკა მდინარაძემ ცალკეული ოპოზიციონერების განცხადებები, რომელიც დამოუკიდებლობის დღესთან დაკავშირებული ღონისძიების შესახებ გააკეთეს.

როგორც მდინარაძემ აღნიშნა, ერი მაშინ არის ერთიანი, როდესაც ეკლესია თავის სარწმუნოებას იცავს. მისი თქმით, ასეთ დროს გარე ძალებისთვის ამ ერის დაყოფა რთულია.

„ბევრი გვისაუბრია ჩვენ ამასთან დაკავშირებით, როგორ არის უზრუნველყოფილი ერის ერთიანობა მაშინ, როდესაც ეკლესია თავისი სამშობლოს, თავისი სარწმუნოების მხარეს და ამ შემთხვევაში დაყოფა და ბატონობა გარე ძალების მიერ არის ერთი ორად რთული და ეს არის ერთადერთი გასაღები, რის გამოც ასე შეიძლება ვინმე ლაპარაკობდეს”, - განაცხადა მდინარაძემ.

ვიცე-პრემიერი ასევე გამოეხმაურა სამთავრობო მედიაში გავრცელებულ ინფორმაციას, რომლის მიხედვითაც, ოპოზიცია 26 მაისს იგორ ბლაჟევიჩის დაწერილი გეგმით იმოქმედებს.

მდინარაძის თქმით, ოპოზიციის ყველა მოქმედება გარე დავალებებზეა დამოკიდებული.

„რომელიმე ჟურნალისტმა შეიძლება რაღაც ინფორმაცია მოიპოვოთ. ეს მაინც იქნება ცალკეული ინფორმაციები, მაგრამ, საბოლოო ჯამში, ასეთი პატარ-პატარა ინფორმაციები იმ ჯაჭვს წარმოადგენენ, რომლის მიხედვითაც ჩვენ ძალიან კარგად ვიცით, რომ ყველა მნათი მოქმედება დამოკიდებულია გარე დავალებაზე.

არცერთი უცხო ქვეყნის მოქალაქე არ მოვა და არ გადაწყვეტს, რომ თავად გახდეს მმართველი. ყოველთვის ეცდებიან, ეს გააკეთონ ქვეყნებში საკუთარი ხალხის ხელით, ჩვენს შემთხვევაში, ეროვნებით ქართველის ხელით, გათიშონ და შემდეგ იბატონონ ამ ქვეყანაზე. ამისი გათვითცნობიერება არის გარანტია იმისა, რომ ჩვენ დამოუკიდებლობას ვერავინ ვერასდროს წაგვართმევს”, - განაცხადა მდინარაძემ.