ჩეხეთის რესპუბლიკაში დაკავებული მიტროპოლიტი ილარიონი და მისი მძღოლი გაათავისუფლეს, - ინფორმაციას რუსული მედია მიტროპოლიტის „ტელეგრამ“ არხზე დაყრდნობით ავრცელებს.

გავრცელებული ინფორმაციით, დაკავებულები ბრალდებების წარდგენის, გირაოს დაკისრების და ქვეყანაში შესვლის აკრძალვის გარეშე გაათავისუფლეს.

შეგახსენებთ, ჩეხეთის რესპუბლიკაში მიტროპოლიტი ილარიონი რამდენიმე დღის წინ დააკავეს. გავრცელებული ინფორმაციით, სამართალდამცავებმა მის ავტომობილში „თეთრი ნივთიერების შემცველი ოთხი პატარა კონტეინერი აღმოაჩინეს“. მიტროპოლიტმა ამოღებულ ნივთიერებებთან კავშირი უარყო.

ჩეხეთის პოლიციის ნარკოტიკებთან ბრძოლის განყოფილების წარმომადგენლის თქმით, პოლიციამ ჩხრეკა ანონიმური შეტყობინების მიღების შემდეგ ჩაატარა.

რუსეთის საგარეო საქმეთა სამინისტრომ მიტროპოლიტის დაუყოვნებლივ გათავისუფლება მოითხოვა და უწყებაში ჩეხეთის ელჩი დაიბარა.