ირანის საგარეო საქმეთა სამინისტროს განცხადებით, აშშ-მა ღამით ჰორმოზგანის რეგიონში, ჰორმუზის სრუტესთან ახლოს განხორციელებული დარტყმებით ცეცხლის შეწყვეტის შეთანხმება დაარღვია.

უწყების მტკიცებით, ირანი უპასუხებს და უყოყმანოდ დაიცავს თავს.

„შეერთებულმა შტატებმა ბოლო 48 საათის განმავლობაში ჰორმოზგანის რეგიონში ცეცხლის შეწყვეტის შეთანხმება უხეშად დაარღვია. ირანი ამ აგრესიული და გაუმართლებელი ქმედებების შედეგად გამოწვეულ ყველა შედეგზე აშშ-ის რეჟიმს აკისრებს პასუხისმგებლობას“, - ნათქვამია ირანის საგარეო საქმეთა სამინისტროს განცხადებაში.

ცნობისთვის, აშშ-ის ცენტრალური სარდლობის განცხადებით, ირანის სამხრეთ ნაწილზე ახალი დარტყმები განახორციელეს. მათი განმარტებით, დარტყმების სამიზნე იყო ირანის სარაკეტო ბაზები და ნავები, რომლებიც ნაღმების განთავსებას ცდილობდნენ. აშშ-ის ცენტრალური სარდლობა ირწმუნება, რომ დარტყმები თავდაცვის მიზნით განხორციელდა და მიზნად ისახავდა აშშ-ის ჯარების დაცვას ირანის ძალების მიერ შექმნილი საფრთხისგან.