სომხურ-ამერიკული პროექტები რეგიონის სხვა ქვეყნებისთვისაც სასარგებლო იქნება, - ამის შესახებ სომხეთის საგარეო საქმეთა მინისტრმა არარატ მირზოიანმა ერევანში, აშშ-ის სახელმწიფო მდივან მარკო რუბიოსთან შეხვედრის შემდეგ განაცხადა.

სომხეთის საგარეო საქმეთა მინისტრის თქმით, ამერიკულ მხარესთან ახალ შეხვედრებსა და კონტაქტების გაგრძელებას მოუთმენლად ელის.

„დარწმუნებული ვარ, რომ ჩვენ ძალისხმევას არ დავიშურებთ, რათა პრეზიდენტ ტრამპისა და პრემიერ-მინისტრ ფაშინიანის მიერ განსაზღვრული პარტნიორობა ეტაპობრივად განვახორციელოთ. ეს სასარგებლო იქნება, როგორც სომხეთისთვის, ისე აშშ-სთვის და ასევე, რეგიონის სხვა ქვეყნებისთვისაც, რომლებიც კონსტრუქციულად ჩაერთვებიან ჩვენს ორმხრივ პროგრამებში“, - განაცხადა არარატ მირზოიანმა.

შეგახსენებთ, დღეს ერევანში აშშ-ის სახელმწიფო მდივანმა მარკო რუბიომ და სომხეთის საგარეო საქმეთა მინისტრმა არარატ მირზოიანმა ყოვლისმომცველი სტრატეგიული პარტნიორობის ქარტია გააფორმეს.

მხარეებმა ასევე ხელი მოაწერეს TRIPP (ტრამპის გზა საერთაშორისო მშვიდობისა და კეთილდღეობისთვის) პროექტის ფარგლებში თანამშრომლობის ჩარჩო-შეთანხმებას და მინერალების მოპოვებისა და გადამუშავების ჩარჩო მემორანდუმს.

შეხვედრის შემდეგ მარკო რუბიომ ერევანი დატოვა და ვაშინგტონში გაემგზავრა.