რუსეთის პრეზიდენტი, ვლადიმერ პუტინი 27 მაისს ყაზახეთს ეწვევა და ევრაზიული ეკონომიკური კავშირის სამიტში მიიღებს მონაწილეობას, - ამის შესახებ ინფორმაციას კრემლის პრესსპიკერი, დიმიტრი პესკოვი ავრცელებს.

დიმიტრი პესკოვის ცნობით, რუსეთის პრეზიდენტი ვლადიმერ პუტინი ხვალ საღამოს ასტანაში ყაზახეთის პრეზიდენტ კასიმ-ჟომარტ ტოკაევს შეხვდება.

28 მაისს რუსეთის პრეზიდენტი ევრაზიული ეკონომიკური კავშირის სამიტში მიიღებს მონაწილეობას.

ამასთან, რუსეთის პრეზიდენტის თანაშემწემ, იური უშაკოვმა განაცხადა, რომ პუტინი 29 მაისს უმაღლესი ევრაზიული ეკონომიკური საბჭოს სხდომაშიც მიიღებს მონაწილეობას.

უშაკოვმა აღნიშნა, რომ უმაღლესი საბჭოს სხდომაზე მხარეები სომხეთის ევროკავშირში გაწევრიანების გეგმებს განიხილავენ.

„მინდა აღვნიშნო, რომ შეხვედრაზე ლიდერები სომხეთის რესპუბლიკის ევროკავშირში გაწევრიანების გეგმების საკითხს განიხილავენ. რა თქმა უნდა, შეფასდება ის რისკები, რასაც ეს ევრაზიული ეკონომიკური კავშირის წევრი ქვეყნების ეკონომიკური უსაფრთხოებისთვის ქმნის“, - აღნიშნა უშაკოვმა.

უშაკოვის თქმით, ევრაზიული ეკონომიკური საბჭოს შეხვედრებს სომხეთის პრემიერ-მინისტრი ნიკოლ ფაშინიანი არ დაესწრება.

„შეხვედრებზე სომხეთს ვიცე-პრემიერი წარმოადგენს, რადგან პრემიერ-მინისტრი ფაშინიანი მოახლოებული არჩევნების გამო ასტანაში ვერ ჩამოვა“, - განაცხადა უშაკოვმა.