თსუ-სთან აქციის მონაწილეებმა საავტომობილო გზა გადაკეტეს
თბილისის სახელმწიფო უნივერსიტეტის პირველ კორპუსთან, შეკრებილმა აქციის მონაწილეებმა საავტომობილო გზა გადაკეტეს.
კერძოდ, მოქალაქეებმა დროშებითა და პლაკატებით თბილისის სახელმწიფო უნივერსიტეტის ტერიტორიიდან გზის სავალ ნაწილზე გადაინაცვლეს.
აქციის მონაწილეები რამდენიმე წუთში მსვლელობას დაიწყებენ და რუსთაველის გამზირზე, პარლამენტთან გადაინაცვლებენ.
ადგილზე იმყოფებიან "ოპოზიციის ალიანსში" შემავალი პარტიების ლიდერები, წევრები და მხარდამჭერები, ასევე, სხვა ოპოზიციონერი პოლიტიკოსები.
აქციის მონაწილეები სკანდირებენ: “თავისუფლება რეჟიმის ტყვეებს!”
აქციის ორგანიზატორების თქმით, დღევანდელი შეკრება იქნება პროტესტის ახალი ტალღის დასაწყისი.
საბოლოოდ, მსვლელობა პარლამენტთან დასრულდება, სადაც დაგეგმილია პოლიტიკური ლიდერების სიტყვით გამოსვლა.
დღის განმავლობაში "ოპოზიციის ალიანსის" წარმომადგენლებმა სცადეს, რუსთაველის გამზირზე სცენის მონტაჟისთვის საჭირო კონსტრუქციების და შესაბამისი აპარატურის შეტანა, რის საშუალებაც მათ შინაგან საქმეთა სამინისტრომ არ მისცა. საპატრულო პოლიციის თბილისის მთავარი სამმართველოს უფროსის, გოგა მემანიშვილის მითითებით, სამარშრუტო ტაქსი, რომელსაც ტექნიკა გადაჰქონდა, უკან გააბრუნეს.
