ისრაელის თავდაცვის ძალებმა სამხრეთ ლიბანში სახმელეთო ოპერაციის მასშტაბი გააფართოვა, - ინფორმაციას The Times of Israel-ი ავრცელებს.

გამოცემის ცნობით, ისრაელის თავდაცვის ძალები სამხრეთ ლიბანში „ჰეზბოლასთან“ ცეცხლის შეწყვეტის შეთანხმების ფარგლებში გამოცხადებული უსაფრთხოების ზონის მიღმა სახმელეთო ოპერაციებს ახორციელებს.

ისრაელის თავდაცვის ძალების განცხადებით, ოპერაციის მიზანი ჩრდილოეთ ისრაელში დრონებით თავდასხმების საფრთხის შემცირებაა.

ცნობისთვის, გუშინ ისრაელის პრემიერ-მინისტრმა, ბენიამინ ნეთანიაჰუმ ისრაელის თავდაცვის ძალებს „ჰეზბოლას“ წინააღმდეგ დარტყმების გაძლიერება უბრძანა.

გასულ ღამეს ისრაელის თავდაცვის ძალებმა „ჰეზბოლას“ 100-ზე მეტ ობიექტს დაარტყეს.