ისრაელმა „ჰამასის“ სამხედრო ფრთის მეთაურის წინააღმდეგ დარტყმა განახორციელა, - ამის შესახებ ერთობლივ განცხადებას ისრაელის პრემიერ-მინისტრი ბენიამინ ნეთანიჰუ და თავდაცვის მინისტრი ისრაელ კაცი ავრცელებენ.

განცხადების თანახმად, ისრაელის თავდაცვის ძალების დარტყმის სამიზნე ღაზაში „ჰამასის“ სამხედრო ფრთის ახალი მეთაური, მოჰამედ ოდეჰი იყო.

ისრაელის პრემიერ-მინისტრმა და თავდაცვის მინისტრმა არ დააკონკრეტეს ის, თუ რა შედეგით დასრულდა დარტყმა.

მანამდე ინფორმაცია გავრცელდა, რომ ისრაელმა ღაზას რიმალას უბანში საცხოვრებელ შენობას დაარტყა. წინასწარი ინფორმაციით, ერთი ქალი დაიღუპა და რამდენიმე ადამიანი დაშავდა.

მოჰამედ ოდეჰმა რამდენიმე დღის წინ „ჰამასის“ სამხედრო ფრთის მეთაურის თანამდებობაზე იზ ალ-დინ ალ-ჰადადი შეცვალა, რომელიც 15 მაისს ისრაელის თავდაცვის ძალების დარტყმის შედეგად დაიღუპა.