გაერო-ში რუსეთის ელჩი, ვასილი ნებენზია აცხადებს, რომ აშშ-მა რუსეთის საგარეო საქმეთა მინისტრის მოადგილეს გაერო-ს უშიშროების საბჭოს სხდომაზე დასასწრებად ვიზა არ მისცა.

ვასილი ნებენზიამ აღნიშნული განცხადება ჩინეთის საგარეო საქმეთა მინისტრის ვან ის ხელმძღვანელობით გამართულ გაერო-ს უშიშროების საბჭოს სხდომაზე გააკეთა.

მისი თქმით, სხდომას რუსეთის საგარეო საქმეთა მინისტრის მოადგილე, ალექსანდრე ალიმოვი უნდა დასწრებოდა.

„რუსეთის დელეგაცია, საგარეო საქმეთა მინისტრ ვან ის მოწვევის საფუძველზე, დღევანდელ სხდომაზე წარმოდგენილი უნდა ყოფილიყო რუსეთის ფედერაციის საგარეო საქმეთა მინისტრის მოადგილის, ალექსანდრე ალიმოვის დონეზე, რომელიც გაერო-სთან დაკავშირებულ საკითხებს ხელმძღვანელობს“, - განაცხადა ნებენზიამ.

ნებენზიამ აღნიშნა, რომ რუსეთმა აშშ-ის დარწმუნება სცადა, რომ ალიმოვისთვის ვიზა გაეცა, თუმცა უშედეგოდ.