დავსვათ კითხვა: არის თუ არა საკმარისი ასეთი პროტესტი პოლიტიკური მიზნების მისაღწევად? პასუხი მარტივია - არ არის საკმარისი, - ოპოზიციონერმა პოლიტიკოსმა არმაზ ახვლედიანმა „პალიტრანიუსის“ გადაცემაში „პოლიტიკური სივრცე“ 26 მასის გამართული აქციის შეფასებისას განაცხადა.

არმაზ ახვლედიანის თქმით, საზოგადოება დაიღალა იმით, რომ მრავალი წლის განმავლობაში პროტესტი ვერ აღწევს სათანადო,სასურველ შედეგს.

„უპირველესად, საკმარისი არ არის იმიტომ, რომ როგორც ჩანს, ჩვენ სათანადოდ ვერ ვაცნობიერებთ, რა ბუნებისაა ეს რეჟიმი. ვამბობთ, რომ ცბიერები არიან, ვირ-ეშმაკები არიან, ყველაფერზე წამსვლელები არიან, მაგრამ ეს ემოციური შეფასებაა, ეს არ შველის საქმეს.

ჩვენ უნდა ვხვდებოდეთ, რომ რეჟიმი მისი პროპაგანდით, ადმინისტრაციული რესურსით და იმით, რომ ის ფაქტობრივად ჩაბეტონდა ამდენი ხნის განმავლობაში, ის ახერხებს იმას, რომ საზოგადოების დიდი ნაწილს მგრძნობელობა დაკარგული აქვს პროტესტის მიმართ, ხელისუფლების მიერ გადადგმული კატასტროფული ნაბიჯების მიმართ სოციალურ სფეროში, სამართლიანობის ფეროში, ევროპის მისამართით, ყველა ეს მიმართულება ხომ ჩახერგილია დღეს საქართველოში.

საზოგადოება დაიღალა იმით, რომ მრავალი წლის განმავლობაში პროტესტი ვერ აღწევს სათანადო, სასურველ შედეგს. და მესამე, ოპოზიცია დღეს ვერ ასხივებს. წარმატებას სჭირდება არა მხოლოდ ერთი მრავალრიცხოვანი აქცია, არამედ სჭირდება გრძელვადიან პერსპექტივაში საზოგადოების დარწმუნება“, - განაცხადა არმაზ ახვლედიანმა.