რუსეთს ამჟამად ნატო-ს წინააღმდეგ მასშტაბური შეტევის დაწყების შესაძლებლობა არ აქვს, მაგრამ შეუძლია დივერსიული ქმედებების ან პროვოკაციების განხორციელება, რისთვისაც ალიანსი მზად უნდა იყოს, - ამის შესახებ პოლონეთის საგარეო საქმეთა მინისტრმა რადოსლავ სიკორსკიმ განაცხადა.

მისი თქმით, რუსეთი პოლონეთისთვის საფრთხეს წარმოადგენს და ეს სერიოზულად უნდა აღიქვან.

„დღეს რუსეთს ნატო-ს წინააღმდეგ მასშტაბური შეტევის დაწყების შესაძლებლობა არ აქვს და ის რომ ამისთვის ემზადებოდა, ჩვენ ამას დავინახავდით - გვაქვს თანამგზავრული დაზვერვა. ვნახეთ 100 000 ჯარისკაცის კონცენტრაცია უკრაინის გარშემო, რომელიც თვეების განმავლობაში იზრდება“, - აღნიშნა პოლონელმა საგარეო საქმეთა მინისტრმა.

ამასთან, მან ხაზგასმით აღნიშნა, რომ პუტინის განზრახვები უფრო სერიოზულია, ვიდრე დასავლეთ ევროპა ელოდა.

„რუსეთს შეუძლია საბოტაჟის ან პროვოკაციების განხორციელება, რაც სრულმასშტაბიან შეჭრას ვერ უტოლდება. ნატო ასეთი ქმედებებისთვის მზად უნდა იყოს“, - აღნიშნა სიკორსკიმ.