ის სიგნალები, რასაც ჩვენ ბოლო პერიოდი ვხედავთ უკრაინის ხელისუფლების მხრიდან, იმედს გვიტოვებს, რომ ხდება გადააზრება უკრაინის ხელისუფლებაში მათი პოლიტიკისა საქართველოსთან და ქართველ ხალხთან მიმართებით, - ამის შესახებ პარლამენტის თავმჯდომარემ, შალვა პაპუაშვილმა ჟურნალისტებს განუცხადა, რითაც გამოეხმაურა უკრაინის საგარეო საქმეთა მინისტრის განცხადებას ქართველი და შვეიცარიელი კოლეგების მხრიდან გამოჩენილი მხარდაჭერის შესახებ.

როგორც შალვა პაპუაშვილმა აღნიშნა, საქართველომ უკრაინასთან მიმართებით ასეულობით რეზოლუციას დაუჭირა მხარი, რომელსაც მომავალშიც გააგრძელებს. პაპუაშვილის თქმით, „ჩვენ ამას მადლობისთვის არ ვაკეთებთ“.

„ჩვენ ამას მადლობისთვის არ ვაკეთებთ, ჩვენ ამას ვაკეთებთ იმისათვის, რომ წესებზე დაფუძნებული საერთაშორისო წესრიგი ფუნქციონირებდეს, ეს მნიშვნელოვანია ჩვენთვისაც, ჩვენი ეროვნული ინტერესებისთვისაც.

როგორც აქამდე ასეულობით რეზოლუციას და სხვადასხვა საერთაშორისო ინსტრუმენტს მხარი დაუჭირა და იყო ინიციატორი საქართველო უკრაინასთან დაკავშირებით, ასევე ვაგრძელებთ ამ პოლიტიკას და ყოველთვის ასე ვიქცეოდით, მიუხედავად იმისა, როგორი დამოკიდებულება ჰქონდა უკრაინის ხელისუფლებას ქართველ ხალხთან, ქართულ სახელმწიფოსთან. ის სიგნალები, რასაც ჩვენ ბოლო პერიოდი ვხედავთ უკრაინის ხელისუფლების მხრიდან, ჩვენ იმედს გვიტოვებს, რომ ხდება გადააზრება უკრაინის ხელისუფლებაში მათი პოლიტიკისა საქართველოსთან და ქართველ ხალხთან მიმართებით. დაველოდოთ, მომავალი გვაჩვენებს, რამდენად სერიოზულად მოხდება გადააზრება იმ მცდარი პოლიტიკისა, რომელიც აქამდე ჰქონდა უკრაინის ხელისუფლებას ქართველი ხალხის და მისი ხელისუფლების მიმართ“, - განაცხადა პაპუაშვილმა.