ბატონი პეტერი ზიზღის ესკადრონების ფიცს იბარებს ხოლმე - მან თავისი ადგილი უფრო ზიზღის ესკადრონებთან დაინახა, ვიდრე საქართველოს არმიასთან, - ამის შესახებ პარლამენტის თავმჯდომარემ, შალვა პაპუაშვილმა განაცხადა.

კითხვაზე, გაუგზავნეს თუ არა გერმანიის ელჩს საქართველოს დამოუკიდებლობის დღისადმი მიძღვნილ ღონისძიებაზე დასწრების მოსაწვევი, პაპუაშვილი პასუხობს, რომ „ყველას გაეგზავნებოდა“.

პარლამენტის თავმჯდომარე აღნიშნავს, რომ თავად ელჩის სურვილიც არ იქნებოდა ღონისძიებაზე დასწრება.

„რა თქმა უნდა, ყველას გაეგზავნებოდა [მოსაწვევი]. მე მგონი, მისი სურვილიც არ იქნებოდა [ღონისძიებაზე დასწრება], იმიტომ, რომ გუშინ იქ ვიდექით ქართულ ჯართან ერთად და ვისმენდით ქართული ჯარის ფიცს. მთელმა საზოგადოებამ ჩავიბარეთ წვევამდელებისგან ქართული არმიის ფიცი, ხოლო ბატონი პეტერი ზიზღის ესკადრონების ფიცს იბარებს ხოლმე. ის არის ერთადერთი ადამიანი, რომელიც საქართველოში აქეზებს, მხარს უჭერს და ამართლებს ზიზღს, სიძულვილის ენას, ძალადობას. ასე რომ მან ალბათ, თავისი ადგილი უფრო ზიზღის ესკადრონებთან დაინახა, ვიდრე საქართველოს არმიასთან. მე არ ვარ ორგანიზატორი, მაგრამ ვვარაუდობ, რომ რა თქმა უნდა, ყველას გაეგზავნებოდა [მოსაწვევი],“ - განაცხადა პაპუაშვილმა.