რუსეთის მუქარის მიუხედავად, ესტონელი დიპლომატები კიევს არ ტოვებენ - ჩვენი საელჩო ღია რჩება, - ამის შესახებ ესტონეთის საგარეო საქმეთა მინისტრი მარგუს ცაჰკნა სოციალურ ქსელში გამოქვეყნებულ პოსტში წერს.

მისი განცხადებით, დიპლომატების, უცხო ქვეყნების მოქალაქეებისა და მშვიდობიანი მოსახლეობის მიმართ მუქარა მიუღებელია და გაეროს ქარტიის აშკარა დარღვევაა.

„რუსეთის მხრიდან დაშინების მცდელობები მხოლოდ მის ნამდვილ სახეს ავლენს. ესტონეთი მუქარის წინაშე ქედს არ მოიდრეკს. ჩვენი საელჩო ღია რჩება, ჩვენი დიპლომატები კიევში რჩებიან და ჩვენ მტკიცედ ვდგავართ უკრაინის გვერდით“, - წერს ესტონეთის საგარეო უწყების ხელმძღვანელი.

მისი თქმით, ეს შეტყობინება გუშინ ტალინში რუსეთის საელჩოს წარმომადგენელსაც გადასცეს.