ევროკავშირში ან ევრაზიულ ეკონომიკურ კავშირში წევრობის შესახებ გადაწყვეტილებას სომეხი ხალხი მიიღებს, - ამის შესახებ სომხეთის პრემიერ-მინისტრმა, ნიკოლ ფაშინიანმა განაცხადა.

„სომეხ ხალხს ალტერნატივა უნდა ჰქონდეს: ევრაზიული ეკონომიკური კავშირის თუ ევროკავშირის შემადგენლობაში იყოს. ამას მე კი არ გადავწყვეტ, არამედ ხალხი, ვისაც ხელისუფლება ეკუთვნის, სომხეთის მოქალაქეები“, - განაცხადა ფაშინიანმა.

მისი თქმით, მთავრობის ამოცანაა, რომ მოსახლეობას ალტერნატივა ჰქონდეს და მათ ეს ალტერნატივა აქვთ.

„ვიტყვი, რომ ჩვენი ის პარტნიორები, რომლებიც ამ პროცესებზე თუნდაც ფარული მუქარით რეაგირებენ, სინამდვილეში საკუთარი თავის წინააღმდეგ მოქმედებენ. ისინი სომეხ ხალხს უნდა მიმართავდნენ და ეუბნებოდნენ: „ჩვენ რაღაც კარგს გავაკეთებთ“. თუმცა, პირიქით, ისინი ამბობენ: „ჩვენ რაღაც ცუდს გავაკეთებთ“. ეს არალოგიკურია. ასევე, არალოგიკურია სომხეთის მუქარა მაღალი ფასებით, რადგან ამ მუქარაზე პასუხი არსებობს: ჩვენ გაცილებით მეტი ეკონომიკური შესაძლებლობა გვექნება, რომ ეს ჩვენთვის პრობლემად არ იქცეს“, - აღნიშნა სომხეთის პრემიერმა.