დიდმა ბრიტანეთმა და პოლონეთმა თავდაცვისა და უსაფრთხოების შესახებ შეთანხმება გააფორმეს, - ინფორმაციას Reuters-ი ავრცელებს.

შეთანხმებას ლონდონში ხელი მოაწერეს, დიდი ბრიტანეთის პრემიერ-მინისტრმა კირ სტარმერმა და პოლონეთის პრემიერ-მინისტრმა, დონალდ ტუსკმა.

დიდ ბრიტანეთსა და პოლონეთს შორის გაფორმებული შეთანხმება მოიცავს - საზღვრების უსაფრთხოების გაძლიერებას, ორგანიზებულ დანაშაულთან ბრძოლას, კოლექტიური თავდაცვის გაძლიერებასა და ევროკავშირთან თანამშრომლობის გაღრმავებას.

ასევე, შეთანხმება რუსეთის მხრიდან საფრთხეებთან დაკავშირებით თანამშრომლობას ითვალისწინებს.

„ევროპის წინაშე არსებული გამოწვევები უფრო ძლიერ პარტნიორობას მოითხოვს. ეს შეთანხმება პოლონეთთან ჩვენი თავდაცვისა და უსაფრთხოების ურთიერთობებში ბოლო ათწლეულების განმავლობაში გადადგმული უდიდესი ნაბიჯია“, - განაცხადა კირ სტარმერმა.