პრეზიდენტ ვოლოდიმირ ზელენსკისთან ტელეფონით საუბრისას კიდევ ერთხელ გავიმეორე რომ ევროპა სრულად უჭერს უკრაინას მხარს მაშინ, როცა რუსეთი სასტიკ აგრესიულ ომს აძლიერებს, - ამის შესახებ ევროკომისიის პრეზიდენტი ურსულა ფონ დერ ლაიენი სოციალურ ქსელში წერს.

„საჰაერო თავდაცვა და დრონებისა და დრონების საწინააღმდეგო შესაძლებლობები ევროპის ყველაზე სასწრაფო თავდაცვის პრიორიტეტებს შორისაა და უკრაინა სრულად იქნება ინტეგრირებული ამ ძალისხმევაში“, - აცხადებს ევროკომისიის პრეზიდენტი.

მისი თქმით, ამ კუთხით, უკრაინის მხარდაჭერის სესხი სასიცოცხლოდ მნიშვნელოვან წვლილს შეიტანს და მხოლოდ წელს, მის ფარგლებში, უკრაინის სამხედრო საჭიროებების დასაკმაყოფილებლად, 28.3 მილიარდი ევრო გამოიყოფა.

„ჩვენ ასევე ვისაუბრეთ უკრაინის ევროკავშირში გაწევრიანების გზაზე. მომდევნო კვირები მნიშვნელოვანი იქნება გაწევრიანების პროცესში გადამწყვეტი ნაბიჯების გადასადგმელად“, - აცხადებს ევროკომისიის პრეზიდენტი.