უკრაინა Gripen C/D სერიის მოიერიშე თვითმფრინავების პირველ სერიას 2027 წლის დასაწყისში მიიღებს, ხოლო E სერიის თვითმფრინავებს - 2030 წლისთვის.

უკრაინული მედიის ცნობით, ამის შესახებ შვედეთის პრემიერ-მინისტრმა ულფ კრისტერსონმა უკრაინის პრეზიდენტ ვოლოდიმირ ზელენსკისთან ერთობლივ პრესკონფერენციაზე განაცხადა.

ორი ქვეყნის ლიდერებმა დღეს უკრაინასა და შვედეთს შორის თავდაცვის სფეროში თანამშრომლობის გაღრმავების შესახებ დეკლარაციას მოაწერეს ხელი.

კრისტერსონის თქმით, Gripen-ის გამანადგურებლები უკრაინისთვის საუკეთესო არჩევანია.

„ახლა ჩვენ ამ ერთობლივ გზაზე ნაბიჯს ვდგამთ წინ. გადავცემთ Gripen-ს. უკრაინა შეიძენს Gripen E სერიის 22 მოიერიშე თვითმფრინავს. მოლაპარაკებები მიმდინარეობს. ჩვენ ვასრულებთ მოლაპარაკებებს და 2030 წლისთვის შევძლებთ ამ თვითმფრინავების მიწოდებას“, - აღნიშნა შვედეთის პრემიერმა.

მისი თქმით, შვედეთი უკრაინას ასევე, ორმხრივი დახმარების სახით, Gripen C/D ტიპის 16 მოიერიშე თვითმფრინავს გადასცემს.