ევროპის ინტერესებში შედის, რომ რუსული ჯარები საქართველოსა და მოლდოვაში აღარ იყვნენ განლაგებული, - ამის შესახებ ევროკავშირის უმაღლესმა წარმომადგენელმა, კაია კალასმა კვიპროსში, ევროკავშირის საგარეო საქმეთა მინისტრების არაფორმალური შეხვედრის დასრულების შემდეგ განაცხადა.

კაია კალასის ცნობით, მინისტრებმა საფუძვლიანად განიხილეს ის, თუ რა დათმობები უნდა მოითხოვოს ევროპამ რუსეთისგან.

„თებერვალში წარვადგინე დოკუმენტი, მაგრამ მინდა იქ არსებულ რამდენიმე პუნქტს შევეხო. უპირობო ცეცხლის შეწყვეტა ნებისმიერი სახის სამშვიდობო მოლაპარაკებების წინაპირობაა. ასევე, რუსეთმა უნდა შეწყვიტოს ევროპის მასშტაბით დივერსიული ოპერაციები, არჩევნებში ჩარევა და კიბერშეტევები. შეზღუდვები რუსეთის არმიაზე უნდა დაწესდეს. ასევე, ოკუპირებული უკრაინის ტერიტორიების სამართლებრივი აღიარება არ იქნება“, - განაცხადა კალასმა.

მისი თქმით, ფართო უსაფრთხოებასთან დაკავშირებული საკითხებიც არსებობს.

„როდესაც რუსულ ჯარებს ვხედავთ ისეთ ქვეყნებში, როგორიცაა საქართველო და მოლდოვა, ნათელია, ევროპის ინტერესებში შედის, რომ ეს ჯარები იქ აღარ იყვნენ განლაგებული“, - აღნიშნა კალასმა.