აშშ-ის მიერ მდიდარი ქვეყნების სუბსიდირების ეპოქა დასრულდა, - ამის შესახებ აშშ-ის თავდაცვის მდივანმა, პიტ ჰეგსეთმა სინგაპურში, კონფერენციაზე - „შანგრი-ლას დიალოგი“ სიტყვით გამოსვლისას განაცხადა.

პიტ ჰეგსეთმა აშშ-ის მოკავშირეებს თავიანთ თავდაცვაზე მეტი პასუხისმგებლობის აღებისკენ მოუწოდა.

„ჩვენ პარტნიორები გვჭირდება და არა პროტექტორატები. ჩვენ გვჭირდება ალიანსები, რომლებიც ერთობლივ პასუხისმგებლობას ეფუძნება და არა დამოკიდებულებას“, - განაცხადა ჰეგსეთმა.

მისი თქმით, აშშ პრიორიტეტს „სამაგალითო მოკავშირეებთან“ თანამშრომლობას მიანიჭებს.

„ძალიან დიდი ხნის განმავლობაში, ჩვენი ევროპელი მოკავშირეებისთვის თავაზიანი თხოვნა, რომ თავიანთ თავდაცვაზე მეტი დაეხარჯათ, უყურადღებოდ რჩებოდა. ახლა ამის გამოსწორებას ცდილობენ. მოკავშირეები, რომლებიც საკუთარი წვლილის შეტანაზე უარს იტყვიან, აშკარა ცვლილების წინაშე აღმოჩნდებიან იმასთან დაკავშირებით, თუ როგორ ვაწარმოებთ საქმეს“, - აღნიშნა აშშ-ის თავდაცვის მდივანმა.

კონფერენციაზე პიტ ჰეგსეთმა ჩინეთის შესახებაც ისაუბრა.

„ჩინეთის მხრიდან რეგიონსა და მის ფარგლებს მიღმა სამხედრო ძალისა და აქტივობების გაფართოების შესახებ საფუძვლიანი შეშფოთება არსებობს. წყნარი ოკეანის რეგიონში ნებისმიერი ჰეგემონის დომინირება რეგიონის ძალთა ბალანსს დაარღვევს. არცერთ სახელმწიფოს, მათ შორის არც ჩინეთს, არ შეუძლია, რომ თავისი ჰეგემონია დააწესოს და ჩვენი ქვეყნისა და ჩვენი მოკავშირეების უსაფრთხოება და კეთილდღეობა ეჭვქვეშ დააყენოს“, - განაცხადა ჰეგსეთმა.