თბილისში გარდაცვლილი ინდოელი სტუდენტის მშობლების განცხადებით, მათ შვილს გაუჩინარებამდე ემუქრებოდნენ.

ინდური მედია თბილისში გაუჩინარებული სტუდენტის მშობლებს რამდენიმე დღის წინ ესაუბრა.

სტუდენტის, დვანიტ რაჯდიპის მშობლების ცნობით, შვილთან ბოლოს კონტაქტი 14 მაისს ჰქონდათ, რის შემდეგაც, მისი მობილური ტელეფონი გაითიშა და დაკავშირება შეუძლებელი გახდა.

როგორც მედია წერს, მშობლებმა დაკარგული შვილის მოსაძებნად თბილისში დვანიტის ძმაც გაგზავნეს და ადგილობრივ ხელისუფლებას შუამავლობისთვისაც მიმართეს.

მშობლების განცხადებით, ბოლო სატელეფონო საუბრისას დვანიტმა მათ აცნობა, რომ თბილისში ბინის მესაკუთრე ემუქრებოდა.

მშობლების ცნობით, დვანიტ რაჯდიპი თბილისში ნაქირავებ ბინაში ცხოვრობდა, სადაც ბინის მესაკუთრე, სახელად ანილის, მხრიდან ფსიქოლოგიურ ზეწოლას განიცდიდა და მესაკუთრე მისგან თანხას ითხოვდა. ოჯახი აცხადებს, რომ ბინის მესაკუთრეს თანხა გადაუხადეს, ხოლო შემდეგ დვაინიტ საცხოვრებლად სხვა ბინაში გადავიდა.

ოჯახი აცხადებს, რომ დვანიტი სამშობლოში ბრუნდებოდა და თვითმფრინავის ბილეთიც კი ჰქონდა. მშობლების თქმით, 14 მაისს დვანიტი აეროპორტში წავიდა, რათა სამშობლოში გაფრენილიყო, თუმცა მალე მასთან კავშირი დაიკარგა.

„ჩემი შვილი საქართველოში ბოლო ორი წლის განმავლობაში ცხოვრობდა. ბინის მესაკუთრე, ვისგანაც ბინა ნაქირავები ჰქონდა, მას ავიწროებდა. ბინის მესაკუთრე წარსულშიც ასე იქცეოდა. ადრე იქ ერთი გოგო ცხოვრობდა, რომელსაც თანხა გამოსძალეს. მან შემდეგ საქართველო დატოვა და ინდოეთში დაბრუნდა“, - განაცხადა სტუდენტის მამამ, მაიურკუმარ რაჯდიპმა.