ივანიშვილს სანქციების შიშმა დიდი ხანია წონასწორობა დააკარგვინა, - ასე შეაფასა „კოალიცია ცვლილებისთვის“ ერთ-ერთმა ლიდერმა, ნიკა გვარამიამ ევროპარლამენტის მიერ მიღებული ანგარიში, რომელიც მოუწოდებს ევროკავშირს, გაყინოს ბიძინა ივანიშვილის აქტივები და ამ საკითხზე ითანამშრომლოს გაერთიანებულ სამეფოსა და აშშ-თან.

ნიკა გვარამიას განცხადებით, „ბიძინა ივანიშვილმა საკუთარ ინტერესებს უსმინოს და არა მისი სამარცხვინო, მარიონეტული მთავრობის ინტერესებს“.

„თავიდან ჩემთვის გასაკვირი იყო და ახლა უკვე აღარც მიკვირს მისი ინსტინქტები. ტვინი თუ არ ჰყოფნიდა, ხერხემალი მაინც კარნახობდა ხოლმე, როგორც „პავლოვის ძაღლს“, რომ სწორი დასკვნები უნდა მიეღო. ახლა ძალიან შეშინებულია, ამ შიშის გამო იღებს რადიკალურად არასწორ გადაწყვეტილებებს. მას გონზე მოსვლა ჯერ კიდევ შეუძლია. თუ იქნება ისეთი გადაწყვეტილებები მიღებული, რომელიც შეუქცევადი იქნება, მერე მნიშვნელობა არ ექნება, რას იზამს ბიძინა ივანიშვილი. ამიტომ, საკუთარ ინტერესებს უსმინოს და არა მისი სამარცხვინო, მარიონეტული მთავრობის ინტერესებს. ბუნებრივია, კობახიძეს ივანიშვილი აქ სჭირდება, გინდ დასანქცირებული, გინდ დასჯილი და ყველანაირი, მათთვის ეს არის სახელმწიფოს სათავეში ყოფნის გახანგრძლივება. ივანიშვილი თუ ამისთვის წირავს საკუთარ თავს და ოჯახს, რომ კობახიძე იყოს პრემიერ-მინისტრი, ვულოცავ, არ ვიცი“,-განაცხადა გვარამიამ.

ცნობისთვის, ევროპარლამენტი მოუწოდებს ევროკავშირს, გაყინოს ივანიშვილის აქტივები და ითანამშრომლოს ამ საკითხთან დაკავშირებით სხვა იურისდიქციებთან, კერძოდ, გაერთიანებულ სამეფოსთან და შეერთებულ შტატებთან.

ანგარიშში ევროპარლამენტი ხაზს უსვამს, რომ ევროკავშირისა და მისი წევრი სახელმწიფოების მიერ ბიძინა ივანიშვილის, “ქართული ოცნების“ ლიდერების, მოსამართლეების, პროკურორების და სხვა თანამდებობის პირების წინააღმდეგ დაწესებული მიზანმიმართული პერსონალური სანქციები დაუსჯელობის წინააღმდეგ მნიშვნელოვანი ინსტრუმენტი იქნება.