ბრალდების მხარეს მთავარი მოწმე ჰყავდა პოლიციელი, რომელმაც თქვა, რომ თურმე პოლიტიკური ლიდერები ჟესტიკულაციით მოუწოდებდნენ ადამიანებს პარლამენტში შეჭრისკენ, თუმცა ვერ გაიხსენა ვერც დღე, ვერ ის, თუ რა მეცვა, - ამის შესახებ „ძლიერი საქართველო - ლელოს“ ერთ-ერთმა ლიდერმა, ბადრი ჯაფარიძემ სასამართლო სხდომის დასრულების შემდეგ ჟურნალისტებთან განაცხადა.

ჯაფარიძის თქმით, ქვეყანაში დამოუკიდებელი სასამართლო რომ იყოს, ეს პროცესი არ გაიმართებოდა.

„ის, რაც დღეს ვნახეთ, ამის გადმოცემაც კი ძნელია. პოლიციელს ვუსმენდით ოთხი საათის განმავლობაში, რომელიც, პრაქტიკულად, არის მთავარი მოწმე და რომელმაც თქვა, რომ თურმე პოლიტიკური ლიდერები ჟესტიკულაციით მოუწოდებდნენ ადამიანებს პარლამენტში შეჭრისკენ. ოღონდ, ჟესტიკულაცია ვერ გაიმეორა, არ ახსოვს, მაგალითად, მე რა მეცვა, არ ახსოვს დღე, არ ახსოვს საათი, არ ახსოვს, სად ვიდექი... ასეთი მოწმე იყო დღეს, ამაზე კომენტარიც კი ზედმეტია.

სამწუხაროდ, თქვენ მოკლებული ხართ შესაძლებლობებს, ეს ყველაფერი გადაიღოთ და ნახოთ, მაგრამ საბედნიეროდ, ეს ყველაფერი იწერება და ინახება და იმის შესაძლებლობა ექნება საზოგადოებას, რომ შემდგომ ნახოს, რასთანაც გვაქვს საქმე.

ჩვენ რომ გვყავდეს დამოუკიდებელი სასამართლო, დღეს ეს პროცესი არ გაიმართებოდა იმიტომ, რომ არანაირი საფუძველი არ არსებობს სასამართლო პროცესისთვის. ეს არის წარმოუდგენლად ფალსიფიცირებული საქმე. ჩვენ ვხედავთ, რომ პროცესი დაჩქარებული ტემპით გრძელდება და ეს თავისთავად საუბრობს ყველაფერზე“, - განაცხადა ბადრი ჯაფარიძემ.

დღეს საქალაქო სასამართლოში ე.წ. საბოტაჟის საქმეზე სასამართლო პროცესი გაიმართა.

ცნობისთვის, ე.წ. საბოტაჟის საქმეზე ბრალი მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს აქვს წარდგენილი.

უფრო კონკრეტულად, გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-იდან 15- წლამდე თავისუფლების აღკვეთას გულისხმობს.

ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.

ნიკა გვარამიას, ნიკა მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.

მიხეილ სააკაშვილს ბრალდება სისხლის სამართლის კოდექსის 317-ე მუხლით აქვს წარდგენილი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას გულისხმობს.