ადვოკატთა ასოციაციის თავმჯდომარე იურიდიული დახმარების სამსახურის დირექტორს შეხვდა
საქართველოს ადვოკატთა ასოციაციის თავმჯდომარე, ირაკლი ყანდაშვილი, იურიდიული დახმარების სამსახურის დირექტორს, ოთარ ჩახუნაშვილს, შეხვდა.
საქართველოს ადვოკატთა ასოციაციის ცნობით, სამუშაო შეხვედრაზე მხარეებმა მიმოიხილეს უწყებებს შორის თანამშრომლობის მნიშვნელოვანი მიმართულებები და სამომავლო ერთობლივი ინიციატივები.
„საუბარი შეეხო იურიდიული დახმარების სამსახურში დასაქმებული საზოგადოებრივი ადვოკატების პროფესიული განვითარების ხელშეწყობასა და საქმიანობის ეფექტიანობის ზრდას.
საქართველოს ადვოკატთა ასოციაციის თავმჯდომარემ ხაზი გაუსვა ადვოკატის პროფესიული დამოუკიდებლობის განსაკუთრებულ მნიშვნელობას ადამიანის უფლებების დაცვის პროცესში, ასევე ადვოკატის პროფესიის ხელშეუხებლობისა და დაცვის გარანტიების გაძლიერების აუცილებლობას. მისი თქმით, სწორედ ადვოკატის პროფესიული დამოუკიდებლობის დაცვა, მაღალი ეთიკური და პროფესიული სტანდარტების განმტკიცება, უწყვეტი პროფესიული განვითარება და ადვოკატთა მხარდაჭერაა მნიშვნელოვანი კომპონენტი ქვეყანაში სანდო, ეფექტიანი და ხარისხიანი მართლმსაჯულების უზრუნველყოფის პროცესში. ირაკლი ყანდაშვილმა ოთარ ჩახუნაშვილს ამ მიმართულებით საქართველოს ადვოკატთა ასოციაციის ხედვა, მიმდინარე ინიციატივები და სამომავლო გეგმები გააცნო.
შეხვედრაზე ასევე ისაუბრეს შესაძლო საკანონმდებლო ინიციატივების შესახებ, რაც ხელს შეუწყობს იურიდიული დახმარების სამსახურში დასაქმებული ადვოკატების საქმეთა ნაკადის განტვირთვას.
მხარეებმა მზადყოფნა გამოთქვეს, მომავალშიც გააგრძელონ მჭიდრო თანამშრომლობა და ერთობლივად იმუშაონ ადვოკატის პროფესიის გაძლიერების, სამართლებრივი დახმარების ხელმისაწვდომობის გაზრდისა და საზოგადოების ინტერესებზე ორიენტირებული მართლმსაჯულების განვითარების ხელშეწყობისთვის“,- აღნიშნულია ინფორმაციაში.
