სტრასბურგის სასამართლოს გადაწყვეტილება არის აბსოლუტურად ჯანსაღი. პრინციპი მარტივია - არ შეიძლება გასაქანი მიეცეს სიძულვილს, აგრესიას ამა თუ იმ საზოგადოებაში,-ასე შეაფასა პრემიერ-მინისტრმა ირაკლი კობახიძემ სლოვენიის მოქალაქის მიერ წარდგენილ საჩივარზე სტრასბურგის სასამართლოს გადაწყვეტილება, რომლის თანახმად, პირად ბლოგზე შეურაცხმყოფელი განცხადებების გავრცელებისთვის პატიმრობის გამოყენება გამოხატვის თავისუფლების უფლებას არ არღვევს.

ირაკლი კობახიძის განმარტებით, „საქართველოს ქვეყნის გარედან თავს ახვევენ სიძულვილს, აგრესიას, რაც არის ქართული საზოგადოებისთვის არაორგანული მოვლენა“.

„ზუსტად ამ მიდგომას ეფუძნება სტრასბურგის სასამართლოს გადაწყვეტილება. ამ მიდგომებს ეფუძნება ჩვენი კანონმდებლობაც, რომელიც ცოტა ხნის წინ მივიღეთ. თქვენ იცით, რომ ქვეყნის გარედან ჩვენ თავს გვახვევენ სიძულვილს, აგრესიას, რაც არის ქართული საზოგადოებისთვის არაორგანული მოვლენა. შესაბამისად, ჩვენ ყველაფერი უნდა გავაკეთოთ იმისთვის, რომ ამ გარედან თავსმოხვეულ ტენდენციებს დავუპირისპირდეთ. ამას ემსახურება კანონმდებლობა და ამისთვის შეიქმნა შესაბამისი დეპარტამენტი შსს-ში. ამ მიმართულებით მაქსიმალურად აქტიურად უნდა გაგრძელდეს მუშაობა“,-განაცხადა კობახიძემ.

ცნობისთვის, სტრასბურგის ადამიანის უფლებათა ევროპულმა სასამართლომ დაადგინა, რომ პირად ბლოგზე შეურაცხმყოფელი განცხადებების გავრცელებისთვის პატიმრობის გამოყენება გამოხატვის თავისუფლების უფლებას არ არღვევს. კერძოდ, „საზოგადოებრივი მაუწყებლის“ ინფორმაციით, საუბარია სლოვენიის მოქალაქის მიერ სტრასბურგში წარდგენილ საჩივარზე, სადაც ის მიუთითებდა, რომ პირად ბლოგზე გავრცელებული განცხადებების გამო მისთვის ექვსთვიანი პატიმრობის შეფარდება გამოხატვის თავისუფლების დარღვევა იყო.