[სუს-ის ბრიფინგზე] რაც გამოაცხადეს, მე არ ვიცი, როგორ შეიძლება ამ ყველაფრის დაჯერება? ნდობა არ არის, - ამის შესახებ პარტია „ევროპული საქართველოს“ თავმჯდომარემ, გიგი წერეთელმა განაცხადა, რითაც სუს-ში გამართულ ბრიფინგს გამოეხმაურა, რომლის მიხედვითაც, 4 ოქტომბრის საქმესთან დაკავშირებით, საქართველო-სომხეთის სასაზღვრო გამშვებ პუნქტებს შორის ნეიტრალურ ზონაში, საქართველოს ძებნილი მოქალაქე დააკავეს.

როგორც გიგი წერეთელმა „პალიტრანიუსის“ გადაცემაში „360 გრადუსი“ განაცხადა, სამართალდამცავ სისტემაში ხელისუფლების მიერ ისეა ყველაფერი ხელში აღებული, რომ „ვისაც უნდათ და როგორც უნდათ ისე დააპატიმრებენ და წარუდგენენ ბრალს“.

„უკვე ყველა ლოგიკას ცდება ის ამბები, რაც საქართველოში ხდება, რეპრესიული გარემოს დამძიმების თვალსაზრისით. მთელი საეთერო და საინფორმაციო სივრცე არის მუდმივად - დაკავება, სასამართლო, ბრალის წარდგენა. წარმოუდგენელი ვითარებაა, გარკვეული პერიოდის წინ, ვერც წარმოგვედგინა, ასე თუ განვითარდებოდა მოვლენები, მაგრამ, როგორც ჩანს, რასაც წიგნებში ვკითხულობდით და რაც ისტორიულად ვიცოდით, რაც სხვა ქვეყნებში ხდებოდა და გვეგონა ჩვენთან არასდროს არ მოხდებოდა, სამწუხაროდ ახლა ეს სურათი იშლება ჩვენ წინ. რაც გამოაცხადეს, მე არ ვიცი, როგორ შეიძლება დაჯერება ამ ყველაფრის.

ზოგადად რაღაც შეიძლება იყოს დამაჯერებელი, რაღაც შეიძლება არ იყოს დამაჯერებელი, მაგრამ თუ შევხედავთ იმ პრიზმაში, რომ დღეს რეალურად ყველაფრის გაკეთება შეუძლია [„ქართულ ოცნებას“], ისეა ყველაფერი ხელში აღებული სამართალდამცავ სისტემაში, ვისაც უნდათ და როგორც უნდათ ისე დააპატიმრებენ და წარუდგენენ ბრალს. ჯერჯერობით დაბეზღებითა და ანონიმური წერილებით არ ხდება [დაპატიმრება], მაგრამ დაახლოებით ასეთი სურათი მალე შეიძლება იყოს, როგორც ეს იყო 30-იან წლებში და შემდეგ. რაღაც წერილს დაწერს ვინმე და იმის საფუძველზე შეიძლება აღიძრას საქმე. ახლა რაც არის, როგორ შეიძლება ყველაფერი დაიჯერო. შეუძლიათ ფაბრიკაცია, ვიღაცა თავის თავზე აიღებს ა.შ. ბევრი კითხვის ნიშანია თვითონ 4 ოქტომბერთან დაკავშირებით, რომ ეს იყო დადგმული, ბევრი ვერსიებია“, - განაცხადა გიგი წერეთელმა.