ჭიდაობის საერთაშორისო ტურნირის, RAF-ის დაწყებამდე ერთი დღით ადრე გამართულ პრესკონფერენციაზე დაპირისპირება მოხდა. როგორც sportall.ge წერს, ხვალ, 11 ივლისს, თბილისში RAF-ის (თავისუფალი სტილით ჭიდაობა) ღონისძიება უნდა გაიმართოს, რომლის ფარგლებშიც, საქართველოს არაერთი ცნობილი სპორტსმენი სტუმრობს. შეჯიბრების წინა დღეს ტრადიციულად პრესკონფერენცია გაიმართა, სადაც დაპირისპირება მოხდა. არსებული ინფორმაციით, ერთმანეთს UFC-ის ქართველი მებრძოლი მერაბ დვალიშვილი და ერთ-ერთი დაღესტნელი სტუმარი დაუპირისპირდნენ. როგორც სხვადასხვა სპორტული გამოცემები წერენ, დაძაბულობა მას შემდეგ დაიწყო, რაც მერაბ დვალიშვილის მიერ UFC-ის მებრძოლ უმარ ნურმაგომედოვთან დაკავშირებით ნათქვამი რეპლიკა ერთ-ერთ სტუმარს არ მოეწონა და გააპროტესტა.

ამასთან, როგორც La Gazzetta Georgia წერს, მერაბ დვალიშვილთან შელაპარაკების შემდეგ, "კავკასიელი მებრძოლები დაცვისა და პოლიციის კორდონის გარღვევას ცდილობდნენ, რათა იმ ოთახში შესულიყვნენ, სადაც ქართველი მებრძოლები იმყოფებოდნენ".