თელავში სტიქიის სალიკვიდაციო სამუშაოები დაიწყო. კავკასიონის ქუჩაზე, სადაც უხვმა ნალექმა და ადიდებულმა ხევმა ყველაზე მეტი პრობლემა შექმნა, მძიმე ტექნიკა მუშაობს. ამ დროისთვის წყლის დონემ დაიწია და გზა ქვა-ღორღისგან იწმინდება.

ასევე, ამ დრომდე მოძრაობა აკრძალულია ქალაქის რამდენიმე ცენტრალურ უბანში. აგრარული ბაზრის ტერიტორიიდან მოქალაქეების უსაფრთხოებიდან გამომდინარე მათი ევაკუაცია განხორციელდა. მოძრაობას საპატრულო პოლიციის ეკიპაჟები აკონტროლებენ.

ქალაქში ვითარება ღამის სამ საათზე გაუარესდა.

გადაუღებელი წვიმის შედეგად თელავის ხევი ადიდდა. მოვარდნილმა ღვარცოფმა, რომელსაც დიდი რაოდენობით ქვა-ღორღი მოჰყვა, ორი ქუჩის დამაკავშირებელი ხიდი მთლიანად დაანგრია.

თელავის მასშტაბით დაზიანებულია გაზმომარაგების სისტემა და ელექტროგადამცემი ხაზები, რის გამოც ათასობით აბონენტს ბუნებრივი აირი და ელექტროენერგია არ მიეწოდება.

სტიქიის ეპიცენტრში მთელი ღამის განმავლობაში იმყოფება კახეთის სახელმწიფო რწმუნებული. მობილიზებულია ყველა შესაბამისი სამსახური.