იემენელი „ჰუსიტების“ განცხადებით, საუდის არაბეთმა სანას საერთაშორისო აეროპორტზე საჰაერო დარტყმები განახორციელა, - ინფორმაციას Reuters-ი ავრცელებს.

„ჰუსიტებმა“, რომლებიც ჩრდილოეთ იემენს აკონტროლებენ, საუდის არაბეთი სანას საერთაშორისო აეროპორტზე დარტყმებში დაადანაშაულეს და პირობა დადეს, რომ საპასუხო იერიშებს განახორციელებენ.

„ჰუსიტების“ სამხედრო წარმომადგენელმა იაჰია სარიმ, აეროპორტზე იერიშებს „აშკარა აგრესია“ უწოდა და აღნიშნა, რომ საუდის არაბეთის დარტყმების შედეგად დეესკალაციის პერიოდი დასრულდა.

მანამდე, იემენის საერთაშორისოდ აღიარებული მთავრობის თავდაცვის სამინისტრომ განაცხადა, რომ შეიარაღებულმა ძალებმა სანას საერთაშორისო აეროპორტის ასაფრენ ბილიკს დაარტყეს, რათა ირანული თვითმფრინავი არ დაშვებულიყო.

იემენის საერთაშორისოდ აღიარებული მთავრობის სამოქალაქო ავიაციის სააგენტომ ქვეყნის მასშტაბით ყველა აეროპორტში საჰაერო მიმოსვლის შეჩერების ბრძანება გასცა.