ევროპელი ლიდერები უკრაინასთან ერთად „ანტიბალისტიკური კოალიციის“ შექმნაზე შეთანხმდნენ, - განცხადებას საფრანგეთის პრეზიდენტის ადმინისტრაცია ავრცელებს.

ელისეის სასახლის ცნობით, პარიზში „მსურველთა კოალიციის“ შეხვედრაზე უკრაინის, დანიის, საფრანგეთის, გერმანიის, იტალიის, ნიდერლანდების, ნორვეგიის, ესპანეთის, შვედეთისა და გაერთიანებული სამეფოს ლიდერები „ანტიბალისტიკური კოალიციის“ შექმნაზე შეთანხმდნენ.

„გვჯერა, რომ ევროპის დაცვა მოითხოვს რაკეტებისგან თავდაცვის ინტეგრირებული არქიტექტურის გლობალურ გადაწყვეტას მომავალი სარაკეტო საფრთხეების შესაკავებლად, რისი შემუშავებაც კოლექტიური ძალისხმევით, ტექნოლოგიური ღიაობითა და სანდო ინდუსტრიული თანამშრომლობით უნდა მოხდეს“, - ნათქვამია განცხადებაში.