აშშ-მა ზოგიერთ კანადურ საქონელზე 50%-იანი ტარიფები დააწესა მას შემდეგ, რაც ორმა ქვეყანამ სავაჭრო შეთანხმებას ვერ მიაღწია, - ინფორმაციას Reuters-ი ავრცელებს.

ტარიფები დაახლოებით 20 მილიარდი დოლარის ღირებულების კანადურ საქონელზე, მათ შორის ჰოკეის ხის ჯოხებზე, ვრცელდება. ეს აშშ-ში კანადის ექსპორტის 5%-ზე ოდნავ მეტს შეადგენს.

Reuters-ი წერს, რომ ახალი ტარიფები პრეზიდენტ დონალდ ტრამპსა და პრემიერ-მინისტრ მარკ კარნის შორის დაძაბულობის ზრდას აღნიშნავს და, სავარაუდოდ, აშშ-მექსიკა-კანადას შორის თავისუფალი ვაჭრობის შეთანხმების განახლების შესახებ უფრო ფართო მოლაპარაკებებს გაართულებს.

კარნიმ განაცხადა, რომ სავაჭრო მოლაპარაკებები შეაჩერა და ახალი ტარიფების საპასუხოდ კანადა „დოლარი დოლარზე“ პრინციპით უპასუხებდა.

„გადავწყვიტე, შევაჩერო სავაჭრო მოლაპარაკებები აშშ-თან და დავავალე კანადის მომლაპარაკებლებს, ოტავაში დაბრუნდნენ. მათ ამ მოლაპარაკებების განმავლობაში, ბოლო წუთამდე, კეთილსინდისიერად იმუშავეს კანადელების ინტერესების დასაცავად. თუმცა, აშშ-ის მიერ შემოთავაზებულ პირობებში ბოლო წუთს შეტანილი ცვლილებები უსამართლო, არაეკონომიური იყო და ნებისმიერი შეთანხმების სანდოობას ეჭვქვეშ აყენებდა“, - აღნიშნა კარნიმ.