ოკუპირებული ცხინვალის ე.წ. საპრეზიდენტო არჩევნებში მონაწილეობას ოთხი „კანდიდატი“ მიიღებს, - ინფორმაციას ე.წ. ცენტრალური საარჩევნო კომისია ავრცელებს.

ოკუპირებული ცხინვალის ე.წ. ცენტრალურმა საარჩევნო კომისიამ „კანდიდატების“ რეგისტრაციის პროცესი დაასრულა.

ე.წ. ცესკოს ცნობით, რეგისტრირებულია შემდეგი კანდიდატები: მარატ კამბოლოვი (ე.წ. პრეზიდენტის მოვალეობის შემსრულებელი, რომელიც წარდგენილია ე.წ. ამომრჩეველთა საინიციატივო ჯგუფის მიერ); ზურაბ კოკოევი (წარდგენილია ე.წ. პარტია „ერთიანობის“ მიერ); მურატ ვალიევი (ე.წ. პარტია „ალანიის პატრიოტები“) და კაზბეკ კოდოევი (წარდგენილია ე.წ. ამომრჩეველთა საინიციატივო ჯგუფის მიერ).

მანამდე, ე.წ. ცესკომ „კანდიდატობის“ მსურველი, ხოხ ჩოჩიევი (წარდგენილი ე.წ. პარტია „ირი ფარნის“ მიერ) არ დაარეგისტრირა და განაცხადა, რომ „წარდგენილი დოკუმენტები და შეგროვებული ხელმოწერების სია კანონით დადგენილ მოთხოვნებს არ შეესაბამებოდა“.

ცნობისთვის, ოკუპირებულ ცხინვალში ე.წ. საპრეზიდენტო არჩევნები 18 სექტემბერს არის დაგეგმილი.