უკრაინის დამოუკიდებლობის დღეს, გაერო-ს უშიშროების საბჭო რუსეთის ომით გამოწვეულ შედეგებს განიხილავს, - ინფორმაციას უკრაინის საგარეო საქმეთა მინისტრი ანდრეი სიბიგა ავრცელებს.

ანდრეი სიბიგას ცნობით, გაერო-ს უშიშროების საბჭოს წევრები რუსეთის მიერ უკრაინაში მშვიდობიანი მოსახლეობის წინააღმდეგ მიმდინარე სასტიკი და ინტენსიური სარაკეტო დარტყმებისა და დრონებით თავდასხმების შედეგებზე ისაუბრებენ.

„ასევე, ჩვენ განვიხილავთ რუსეთის მიერ უკრაინის პორტებზე თავდასხმებს და მარცვლეულის ექსპორტის შეფერხებას, რომელიც გლობალურ სურსათის კრიზისს ამწვავებს და მილიონობით ადამიანს საფრთხეს უქმნის“, - წერს სიბიგა X-ზე.

ცნობისთვის, დღეს უკრაინა დამოუკიდებლობის დღეს აღნიშნავს.