სუნიტი მუსლიმები წინასწარმეტყველ მუჰამადის დედამიწაზე მოვლინების დღეს აღნიშნავენ. ამის შესახებ ინფორმაციას რელიგიის საკითხთა სახელმწიფო სააგენტო ავრცელებს.

„დღეს, სუნიტი მუსლიმები აღნიშნავენ წინასწარმეტყველ მუჰამადის დაბადების დღეს, „მავლიდ ან-ნაბის“. ტრადიციის მიხედვით, მუჰამადი დაიბადა 571 წელს მექაში. ამ დღეს მუსლიმები მადლობას უხდიან ალაჰს, სამყაროსთვის მუჰამადის მოვლინების გამო, კითხულობენ ქადაგებებს მუჰამადის ცხოვრების შესახებ, ამზადებენ სადღესასწაულო კერძებს, ეპატიჟებიან ნათესავებს და მეგობრებს. მიღებულია ბავშვებისთვის საჩუქრების გადაცემა და მოწყალების დარიგება ღარიბებისთვის.

რელიგიის საკითხთა სახელმწიფო სააგენტო ულოცავს სუნიტ მუსლიმებს ამ დღესასწაულს, სიკეთეს და საყოველთაო მშვიდობას უსურვებს მათ” - ნათქვამია ინფორმაციაში.