დღეს ჩვენი იმედი გადის უკრაინის ბრძოლაზე, ჩვენი ვალდებულებაა, რომ გამოვხატოთ ჩვენი სოლიდარობა უკრაინის მიმართ, - ამის შესახებ საქართველოს მეხუთე პრეზიდენტმა, სალომე ზურაბიშვილმა უკრაინის საელჩოსთან მიმდინარე აქციაზე ჟურნალისტებს განუცხადა.

ზურაბიშვილის თქმით, უკრაინის პოლიტიკური ხედვები მას უკვე გამარჯვებულს ხდის რუსეთთან ბრძოლაში.

„ერთი და იგივე ბრძოლა იმისთვის, რომ უკრაინა დარჩეს თავისუფალი და დამოუკიდებელი და საქართველომაც დაიბრუნოს სრული დამოუკიდებლობა და თავისუფლება. ორივე ბრძოლა გამარჯვებით დასრულდება.

ამავე დროს, მე ვწუხვარ, რომ დღეს აქ არ დგას ქართველების დიდი ჯარი და ყველა ის, რომლის მომავლისთვისაც დღეს უკრაინა იბრძვის, ყველა ახალგაზრდა, დანარჩენი საქართველო. დღეს ჩვენი იმედი გადის უკრაინის ბრძოლაზე.

ჩვენ არ ვიცით, როგორი იქნება სამხედრო შედეგი, მაგრამ ვიცით, რომ პოლიტიკური ხედვები არის უკვე უკრაინის გამარჯვება და ჩვენთვის ეს არის ძალიან მნიშვნელოვანი. ჩვენი ვალდებულებაა ის, რომ გამოვხატოთ ჩვენი სოლიდარობა უკრაინის მიმართ, რადგან ჩვენი და მათი სამომავლო ბედი არის ერთი. ასევე ევროპის ბედიც, ეს მხოლოდ საქართველოს არ ეხება“, - განაცხადა სალომე ზურაბიშვილმა.