სომხეთის პრეზიდენტის რობერტ ქოჩარიანისა და მისი ოჯახის წევრების კუთვნილ მისამართებზე ჩხრეკა ტარდება - ქოჩარიანი ანტიკორუფციულ კომიტეტში გადაიყვანეს
სომხეთის ყოფილი პრეზიდენტი, რობერტ ქოჩარიანი ანტიკორუფციულ კომიტეტში გადაიყვანეს, - ინფორმაციას სომხური მედია ავრცელებს.
სომხეთის ანტიკორუფციული კომიტეტის განცხადებით, ქვეყნის ყოფილი პრეზიდენტისა და ოპოზიციური ბლოკის „სომხეთის ალიანსის“ ლიდერის, რობერტ ქოჩარიანისა და მისი ოჯახის წევრების კუთვნილ მისამართებზე ჩხრეკა ტარდება.
„გაცნობებთ, სომხეთის რესპუბლიკის ანტიკორუფციულ კომიტეტში კორუფციასთან დაკავშირებულ დანაშაულებრივ საქმეზე მიმდინარე სისხლისსამართლებრივი დევნის ფარგლებში, რამდენიმე ათეულ მისამართზე ჩხრეკა და სხვა საპროცესო მოქმედებები ტარდება“, - ნათქვამია ანტიკორუფციული კომიტეტის განცხადებაში.
ასევე, ქვეყნის პარლამენტის ფრაქცია „სომხეთის“ წევრმა მესროპ მანუკიანმა განაცხადა, რომ სამართალდამცველებმა ჩხრეკა რობერტ ქოჩარიანის ვაჟის, ლევონ ქოჩარიანის სახლშიც ჩაატარეს.
მოგვიანებით, სომხეთის ყოფილი პრეზიდენტის ოფისის ხელმძღვანელმა, ბაგრატ მიქოიანმა ინფორმაცია გაავრცელა, რომ საგამოძიებო ორგანოებმა რობერტ ქოჩარიანი ანტიკორუფციულ კომიტეტში გადაიყვანეს.
