ირანის პრეზიდენტის, მასუდ პეზეშკიანის, განცხადებით, შეერთებული შტატები ეკონომიკური სანქციების ახალი რაუნდით ვერაფერს მიაღწევს, - ინფორმაციას ირანული მედია ავრცელებს.

„მთავრობის ეკონომიკური სექტორების მიერ მომზადებული ზომებით, შეერთებული შტატები ეკონომიკური ზეწოლითაც ვერაფერს მიაღწევს ისევე, როგორც ირანის შეიარაღებული ძალების სიმამაცისა და ხალხის მხარდაჭერის წყალობით ომში ვერაფერს მიაღწია“, - აღნიშნა პეზეშკიანმა.

მან მადლიერება გამოხატა საჯარო და კერძო სექტორების მიმართ, რომლებიც აგრძელებენ მუშაობას სირთულეების მიუხედავად, „ეკონომიკური ჯიჰადის“ დროს ხალხის საარსებო საჭიროებების დასაკმაყოფილებლად და ბაზრების სტაბილიზაციისთვის.

„ჩვენი მიდგომაა საკითხების გაგება და მოგვარება ჩართულობისა და მოლაპარაკებების გზით. ამავდროულად, ჩვენ მტკიცედ დავდგებით და გავაგრძელებთ მტკიცედ დგომას ეკონომიკური ზეწოლის წინააღმდეგ“, - აღნიშნა ირანის პრეზიდენტმა.