საპროტესტო აქციის დროს დაკავებულის, გურამ ხუტაშვილის განცხადებით, მისთვის მოულოდნელი იყო, რომ 28 აგვისტოს საპატიმრო დაწესებულებას დატოვებდა. მისი თქმით, შეწყალების მიმართვა ადრე ჰქონდა გაკეთებული.

„[ციხის დატოვების შესახებ] სიმართლე გითხრათ, არანაირად არ ვიცოდი, საერთოდ, არც ველოდებოდი. [შეწყალების მოთხოვნის განცხადება] ადრე მქონდა დაწერილი, დაახლოებით 9 თვე იყო“,- განაცხადა გურამ ხუტაშვილმა.

რაც შეეხება ციხეში არსებულ სიტუაციას, თუ როგორ ექცეოდნენ მას, განმარტავს, რომ „არც ცუდი იყო და არც კარგი“.

ცნობისთვის, საქართველოს პრეზიდენტმა, მიხეილ ყაველაშვილმა მარიამობის დღესასწაულთან დაკავშირებით, 226 პირი შეიწყალა. შეწყალებულ პირთა შორის არიან 4 ოქტომბრის საქმეზე დაკავებული ავთანდილ თოფჩიშვილი და თორნიკე მჭედლიშვილი, ასევე, საპროტესტო აქციების დროს დაკავებული ფრიდონ ბუბუტეიშვილი, დავით ხომერიკი, სიმონ მახარაძე, საბა ჯიქია, გურამ ხუტაშვილი, დანიელ მუმლაძე და დენის კულანინი.