„ძლიერი საქართველო -ლელო” ხელვაჩაურის მერიას კირნათის ადმინისტრაციულ ერთეულში შემავალი 6 სოფლისთვის მთის დასახლების სტატუსის მინიჭების მოთხოვნით პეტიციით მიმართავს
„ძლიერი საქართველო-ლელოს“ წევრებმა ხელვაჩაურის მუნიციპალიტეტის მერიაში მოსახლეობის პეტიცია დაარეგისტრირეს, რომლითაც კირნათის ადმინისტრაციულ ერთეულში შემავალი ექვსი სოფლისთვის მთის დასახლების სტატუსის მინიჭებას ითხოვენ.
პარტიის წარმომადგენლების განცხადებით, აღნიშნულ სოფლებში მცხოვრები მოსახლეობა წლებია არაერთ სოციალურ და ეკონომიკურ გამოწვევას აწყდება. მათი შეფასებით, დასახლებებისთვის მთის სტატუსის მინიჭება ადგილობრივ მოსახლეობას კანონით გათვალისწინებული სოციალური და ეკონომიკური შეღავათებით სარგებლობის შესაძლებლობას მისცემს და სოფლებში ცხოვრების პირობების გაუმჯობესებას შეუწყობს ხელს.
პეტიციის ინიციატორები ხელვაჩაურის მუნიციპალიტეტის მერს მოუწოდებენ, საკითხით დაინტერესდეს და შესაბამის სახელმწიფო უწყებებთან შუამდგომლობის პროცესი დაიწყოს, რათა კირნათის ადმინისტრაციულ ერთეულში შემავალმა სოფლებმა მთის დასახლების სტატუსის მისაღებად კანონით გათვალისწინებული პროცედურები გაიარონ.
„ძლიერი საქართველო - ლელოს“ წარმომადგენლების განცხადებით, საუბარია კირნათის ადმინისტრაციულ ერთეულში შემავალ ექვს სოფელზე, რომელთა მოსახლეობისთვის მთის დასახლების სტატუსი განსაკუთრებით მნიშვნელოვანია, რადგან აღნიშნული სტატუსი არაერთი სახელმწიფო შეღავათითა და სოციალური მხარდაჭერის მექანიზმით სარგებლობის შესაძლებლობას ქმნის.
პარტიაში მიიჩნევენ, რომ მაღალმთიან დასახლებებში მოსახლეობის შენარჩუნება და სოფლების განვითარება სახელმწიფოს ერთ-ერთი მნიშვნელოვანი ამოცანა უნდა იყოს. მათი თქმით, შესაბამისი სტატუსის არსებობა ხელს შეუწყობს ადგილობრივებისთვის სოციალური პირობების გაუმჯობესებას, ეკონომიკური საქმიანობის წახალისებას და სოფლებში მოსახლეობის დარჩენას.
„ძლიერი საქართველო - ლელოს“ წევრები აცხადებენ, რომ პეტიციაზე მოქალაქეების ხელმოწერებით დაფიქსირებული მოთხოვნა მუნიციპალიტეტის მხრიდან სათანადო ყურადღებასა და რეაგირებას საჭიროებს. მათი განცხადებით, მუნიციპალიტეტის მერიამ უნდა გამოიყენოს საკუთარი უფლებამოსილება და შესაბამის ორგანოებთან იშუამდგომლოს, რათა საკითხის განხილვა დაჩქარდეს.
მათი განცხადებით, მიზანი მხოლოდ სტატუსის ფორმალურად მინიჭება არ არის და მნიშვნელოვანია, რომ კირნათის ადმინისტრაციულ ერთეულში შემავალი სოფლების მოსახლეობამ რეალურად შეძლოს იმ სოციალური და ეკონომიკური შეღავათებით სარგებლობა, რომელსაც კანონმდებლობა მთის დასახლებებისთვის ითვალისწინებს.
„ძლიერი საქართველო-ლელოში“ აცხადებენ, რომ საკითხზე მუშაობას გააგრძელებენ და პროცესში ადგილობრივი მოსახლეობის ინტერესების დაცვას უზრუნველყოფენ.
